Saturday, 28 November 2020

తులసీ షోడశ నామావళి మరియు తులసీ స్తోత్రం

 తులసీ షోడశ నామావళీ

శ్లో॥ తులసీ శ్రీమహాలక్ష్మీః విద్యాఽవిద్యా యశస్వినీ .

ధర్మ్యా ధర్మావనాసక్తా పద్మినీ శ్రీర్హరిప్రియా ..


లక్ష్మీప్రియసఖీ దేవీ ద్యౌర్భూమిరచలా చలా .

షోడశైతాని నామాని తులస్యాః కీర్తయేన్నరః .

లభతే సుతరాం భక్తిం అంతే విష్ణుపదం లభేత్ ..


తులస్యై నమః . శ్రీమహాలక్ష్మ్యై నమః . విద్యాయై నమః . అవిద్యాయై

నమః . యశస్విన్యై నమః . ధర్మ్యాయై నమః . ధర్మావనాసక్తాయై నమః .

పద్మిన్యై నమః . శ్రియై నమః . హరిప్రియాయై నమః .

లక్ష్మీప్రియసఖ్యై నమః . దేవ్యై నమః . దివే నమః . భూమ్యై నమః .

అచలాయై నమః . చలాయై నమః .

శ్రీతులసీస్తోత్రం

జగద్ధాత్రి! నమస్తుభ్యం విష్ణోశ్చ ప్రియవల్లభే . యతో బ్రహ్మాదయో దేవాః సృష్టి స్థిత్యంతకారిణః .. 1.. నమస్తులసి కల్యాణి నమో విష్ణుప్రియే శుభే . నమో మోక్షప్రదే దేవి నమః సంపత్ప్రదాయికే .. 2.. తులసీ పాతు మాం నిత్యం సర్వాపద్భ్యోఽపి సర్వదా . కీర్తితాపి స్మృతా వాపి పవిత్రయతి మానవం .. 3.. నమామి శిరసా దేవీం తులసీం విలసత్తనుం . యాం దృష్ట్వా పాపినో మర్త్యా ముచ్యంతే సర్వకిల్బిషాత్ .. 4.. తులస్యా రక్షితం సర్వం జగదేతచ్చరాచరం . యా వినిహంతి పాపాని దృష్ట్వా వా పాపిభిర్నరైః .. 5.. నమస్తులస్యతితరాం యస్యై బద్ధాంజలిం కలౌ . కలయంతి సుఖం సర్వం స్త్రియో వైశ్యాస్తథాఽపరే .. 6.. తులస్యా నాపరం కించిద్దైవతం జగతీతలే . యథా పవిత్రితో లోకో విష్ణుసంగేన వైష్ణవః .. 7.. తులస్యాః పల్లవం విష్ణోః శిరస్యారోపితం కలౌ . ఆరోపయతి సర్వాణి శ్రేయాంసి వరమస్తకే .. 8.. తులస్యాం సకలా దేవా వసంతి సతతం యతః . అతస్తామర్చయేల్లోకే సర్వాన్ దేవాన్ సమర్చయన్ .. 9.. నమస్తులసి సర్వజ్ఞే పురుషోత్తమవల్లభే . పాహి మాం సర్వ పాపేభ్యః సర్వసంపత్ప్రదాయికే .. 10.. ఇతి స్తోత్రం పురా గీతం పుండరీకేణ ధీమతా . విష్ణుమర్చయతా నిత్యం శోభనైస్తులసీదలైః .. 11.. తులసీ శ్రీర్మహాలక్ష్మీర్విద్యావిద్యా యశస్వినీ . ధర్మ్యా ధర్మాననా దేవీ దేవీదేవమనఃప్రియా .. 12.. లక్ష్మీప్రియసఖీ దేవీ ద్యౌర్భూమిరచలా చలా . షోడశైతాని నామాని తులస్యాః కీర్తయన్నరః .. 13.. లభతే సుతరాం భక్తిమంతే విష్ణుపదం లభేత్ . తులసీ భూర్మహాలక్ష్మీః పద్మినీ శ్రీర్హరిప్రియా .. 14.. తులసి శ్రీసఖి శుభే పాపహారిణి పుణ్యదే . నమస్తే నారదనుతే నారాయణమనఃప్రియే .. 15.. ఇతి శ్రీపుండరీకకృతం తులసీస్తోత్రం సంపూర్ణం ..

0 Comments:

Post a comment

Subscribe to Post Comments [Atom]

<< Home